اشتهينا اخباركم بس من سمعناها
تذكرنا الوجوه الما نسيناها
تذكرنا الدموع العل رساله اتطيح
والحيره البلوجوه المافهمناها
وحك كل ليله مرت وانتم ابعاد
وحك اكلوبنا المكسوره عفناها
شما غبتو بعدكم عدنا غالين
اي والفركه هاي الما نويناها
وياكم عشنا نار اخركم رماد
وجبنا رواحنا وبيكم شمرناها
اي واحلامنا الضلت ورانا احجار
لانكدر انلمها ولا بنيناها
اذيتونا حد ما كمنا نشتاك
الاذيتكم هذيج الافتقدناها
حركنا كلوبنا بنضرات الوداع
بس ضلت صوركم ماحركناها
بعد شنريد ما دام انتو زينين
وطيبه كلوبكم ذيج الخسرناها
وعرفنا الدنيا من بواحد اتدور
والذله الكبل نسمعها ضكناها
وعلي عفنا لجلكم وين الاعزاز
الناس البطلاع الروح جبناها
تره ذنب الشجر مو كله عل حطاب
مايوصل الشجره الخضره يلكاها
