زجلية حزيرانية
محمد الاخرس
ياعقل شو اللي جرى ويا قلب شو اللي صار
معقول جيوش العرب اِتْبات مهزومه؟؟!!
جيوش مثل النمل وشعوب كالطوفان
والكل بحلم حلم بالنصر مغرومي
والكل شمر عن السيقان والذرعان
والكل غنى ورقص يا سباعنا قومي
مسكين شو مسكين يا ميمتي الوجعان
عشرين سنة استنيت واليوم هو يومي
العرب اهل البطولة واشجع الشجعان
شو اللي جرى قولو .. لامزع هْدومي
علمي قهرنا القهر والظلم والطغيان
وسطرنا اروع صحف بالمجد مختومه
وبهرنا الشرق والغرب والفرس والرومان
وعلمنا كل الامم اخلاق مرسومه
يا خلق ظهري نكسر والهم فوقو اطنان
والحظ شكلو عثر والروح مغرومه
والحب حب الوطن .. محسوبكم ولهان
من صغر سني وانا من الارض محرومي
ما كان هذا الامل يا خيّ يا حْزيران
جرعتنا يا حيف كاسات موهومه
كملت عا راسي اليوم يا عمي ياحميدان
معقول نخسر حرب مكتوبه معلومه؟!
جيوش مثل النمل فكرتهم طوفان
لكن "ما كو امر" وافواه مكتومه
والقلب شكلو نفطر من منظر "الفرسان"
على الارض ،والسما بغربان مرشومه
وبخمسه الشهر دوّت يا ناس في الميدان
اصوات المدافع رعد .. والقصة مفهومه
ونار الاشاعة بدت ، وحَليمنا حيران
يا ناس روحو روحو ..يا خِيّْتي قومي
في ليل الهريبة شفت زلام مع نسوان
واطفال تبكي غصب ، والام مهمومه
احمل اخوك شوية ريحني يا زعلان
اللي انكتب يا بني منشوفو مرسومي
والله الهزيمة ذل وآلام مع احزان
بساعات مش ايام الشغلة محسومه
القدس سقطت وغزة وسينا والجولان
معقول هاللي حصل ؟!معقول يا قومي؟؟؟!!!
مع تحياتي
محمد الأخرس
