طَير الهدهد دير جبرة وآسَّرفد
طِير و بعَّد شوف زينة اللثمادة
قاشي دمَّـد راب للصحرا هوَّد
عاڤب مسعد ڤال قاصد كردادة
بر آمكدد شـاو نڤضة ولّ آزوَد
قيمو لبَّد فوڤ رجراج حمـادة
عندك ترڤد تاخذك عينك تسهد
طرف المجبد ياسرين الصيادة
ليها تلحڤ عيـد عنها لا تجحد
كون موَدَد حين تصفى ودادة
سال و عَوَّد ڤـوللها راه آمقيدد
يِبات يعدد حـارمه لو لوسـادة
عزك يصهد زايدو وحش اِيلَهَّد
لَابَت تخمد نارها فوڤ آلعـادة
زيد آتأكد حين تنظر صاف الود
حدَّث و آزهد لا تكثَّرش زيـادة
آحذر و آجبد لا تَّامن حتى حـد
نظرت محسد راه عينو حسَّـادة
فيها نجبد وصفها كي فات الحد
آستر وآجحد ذيك شمس الوقَّادة
عنهـا حيَّـد كي ڤـدالات المجبـد
زهر آمورَّد في بساتين ريادة
مطبوع الڤد غرامها فيا يرعد
فيـا تزند عيـن لجدل يـا قـادة
خانة ع الخد طابعتها يا حمَّـد
خزرتها فيها الحمَّى و رعـادة
حاجب سنَّـد طابع العين آمحدد
كُحل المرود زاد للڤلب آنهـادة
شفـر آمهنَّد قاع من شافو يخمد
خشم آسّڤعد فوڤ شارب ياسادة
دم آمكبَّــد كان مسيـتـو يجمــد
جــاب الهدة مــا يوالم لـكدادة
صدر آمشيَّد قاخيمة فوڤ آعمد
جـوف آمشدد حـازماتو بڤلادة
شعر آمفرهد قاظلمة طاح آسوَد
ثاث آمثروَد بيه لآرياح آشرادة
ساڤ آملمَّـد قا ڤبص جبن عنَّـد
فـوڤ المثـرد ناشراتــو بــدَّادة
عنها نهرد ڤاع من جاني حـرَّد
سيفي يلهـد ما يخلي حسَّـــــادة
بيهـا نسعـد كان تخطيني ننـكد
زهري يرڤد و المحاين زنَّادة
آنريَّح لابُـد مع رافـاڤتهـا نهمد
و عنها نعبـد خالقي كم عبـادة ...يتبع
بقلمـــــــي medcherif03
| 
