صباحك نكت
فنجان القهوة
الزبون : جرسون تعا لهون.
الجرسون : خير أستاذ بشو بقدر أخدمك؟
الزبون : فيك تفهمني شو معناتو وجود دبانة "ذبابة" بفنجان هالقهوة؟
الجرسون : بعتذر منك أستاذ، صدقني ما بعرف أقرأ الفنجان
القاضي والشاهد
القاضي : جيبولي الشاهد لهون.
الشاهد : أمرك سيدي!
القاضي : قلي يا ابني لما شفت المتهم والمجني عليه، نازلين ضرب ببعض بالكراسي .. ليش ما تدخلت قبل ما تصير حادثة الوفاة؟
الشاهد : والله يا سيدي حاولت بس صدقني ما لقيت ولا كرسي فاضي!
الموظف : من فضلك استاذ بدي إجازة نص ساعة
المدير : خير إن شاء الله
الموظف : لأني منتظر حدث سعيد عقبال عندك
المدير : طيب إذا هيك ما في مانع ومبروك مقدماً
وبعد ساعة رجع الموظف فسأله المدير : شو خير؟
الموظف : الله يجعلك الخير دايماً بطريقك يا أستاذ
المدير : ما قلتلي شو هالحدث السعيد؟ ولد أو بنت
الموظف : والله يا أستاذ هالشغلة ما بتبين غير لبعد 9 شهور.
الزوجة الغيورة
- شو قصتك زعلان ومهموم كل هالقد؟
- مرتي يا أخي رح تجنني!
- ليش خير؟
- طول الليل دايرتها من السينما للكازينو .. ومن الكازينو للنايت كلوب .. ومن النايت كلوب للـ !!!
- يا لطيف ألطف .. وليش هيك؟
- قال يا سيدي عم تدوّر عليّ ..
تاكسي !!
وقفت سيدة سيارة التاكسي وقالت لولادها الخمسة : يلا يلا اطلعوا خلصوني بالسيارة يلا خالد .. محسن .. سوسن .. سامية .. وأنت يا عبودي روح قعود أدام جنب عمو السواق.
والتفت عالسواق وقالتله : شغل هالعداد من فضلك واستناني خمس دقايق بس
ودخلت على محل كبير وغابت شوي ورجعت بعدين عالتاكسي وقالت للسواق : شو الحساب يا أخي؟
رد عليها : الحساب!! أي حساب؟ أي نحنا لسه ما تحركنا من أرضنا!
قالتله ببرودة : أي ومين قلك أنو أنا كنت ناوية اتحرك يعني؟ كل القصة أني حبيت احكي هالتلفون بعيد عن صريخ ودوشة هالولاد!!!
السيارة أم الزوجة
في واحد راح يشتري سيارة، فقاله صاحب المعرض شو مواصفات السيارة اللي ببالك؟
قاله : أهم شي تكون اقتصادية.
فقاله صاحب المعرض : ولا يهمك عندي هالسيارة البيضا اقتصادية ومصروفها قليل
قال الرجل : كتير منيح بس كمان تكون مواصفاتها حديثة.
رد صاحب المعرض : معناها ما إلك غير هالسيارة السودة اقصادية كتير و"فل أوبشن" مع فتحة بالسقف.
فقاله والأهم من هيدا كله : السعر يكون سعرها معقول.
فقاله صاحب المعرض : حظك كتير حلو هالسيارة الرصاصية اقتصادية جداً و"فل أوبشن" مع فتحة بالسقف، وعاملين عليها عرض رهيب بنص سعرها.
فقاله الرجل : أي كتير حلوة فعلاً وسعرها معقول .. بس .. بس زوجتي ما بتحب هيدا اللون!!
فتنهد صاحب المعرض وقاله : عمّي، بأكدلك أنو أحسنلك تروح تلاقيلك شي زوجة تانية من أنك تلاقيلك سيارة لقطة بهيك سعر!!
الطابع الفاشل
أمر "حاكم ظالم" أنو يحطوا صورته على طوابع البريد وبعد فترة شاف أنو الإقبال على شراء هالطوابع كتير ضعيف قام استدعى مدير البريد وسأله شو السبب؟
فقله المدير : السبب أنو هالطوابع ما عم بتلزق بالظروف
فقال الحاكم : ما عم تلزق بالظروووف!! ليش ما عم تستخدموا أحسن أنواع الصمغ؟
المدير : أكيد الصمغ ممتاز .. بس الناس كل ما يجوا حتى يستخدموا الطابع عم بيبصقوا عالوش الأدماني"الأمامي".
السؤال التقليدي
الزوج : ما عرفتي من قبلي رجال يا حياتي؟
الزوجة : لا طبعاً وهادا سؤال بينسأل؟
الزوج : أي عادي بينسأل ليش لا، يعني ولا حدا من قبلي كلمك أو لمسك؟
الزوجة : طبعاً لا!! بشو بدك أحلفلك أني ما عرفت حدا قبلك حتى تصدق؟؟ بس أنتو هيك دايماً يا رجال، روح قلبكم تسألوا الوحدة هالسؤال!!!!
