" وسمعتى كلامه ليه يا مهشكه" كانت جملته الأشهر في فيلم "بين السما والأرض"، اختارها لينتقد سيدة تبدي ندمها على خيانتها لزوجها، فمن ثياب البواب لزي عسكري الدرك لأدوات الجنايني تنقل الفنان عبدالغني النجدي ليترك لنا ميراثا متنوعا كلنا أجمع على أهميته في إثراء السينما المصرية، فلولا خفة ظله وتمكنه من التعامل ما تسلل اسم "النجدي" ليحرك فضول النقاد حول فطريته الإبداعية، إنه العبقري المهمش بفعل الزمن، خادم "استيفان روستي" والسنيد بلغة السينما.

كانت أدواره شفرات الضحك التلقائية لأفلامه التي تجاوزت المائة بقليل، لعب الأدوار المهمشة بحرفية شديدة من البواب إلى الخادم مرورا بالعسكري وأخيرا شخصية "عوكل" في فيلم "الفانوس السحري"، حيث اشتهر بجملته خفيفة الظل "مشتاقين قوي يا دميل" التي لم تمل سماعها الفنانة خيرية أحمد "فواكه"، طيلة أحداث الفيلم.

النجدي لم يقدم طيلة حياته الفنية سوى الأدوار الصغيرة التي لم تتعد مشاهدها أصابع اليد الواحدة إلا أنها ما زالت عالقه بأذهاننا، كلنا يضحك وتختلف البسمة من وجهي لوجهك حين نراه ينادي" دمبري دمبري ".

اعترف ودعونا نصدق قليلا ليس لكاتب السيناريو والحوار الفضل في بساطة الشخصية والتلقائية المجردة في تعبيرات الوجه، فالنجدي الذي لم يأخذ نصيبه من الشهرة واكتفى بحظه القليل من الذكري كتب النكات والمسرحيات والروايات.. ولكن من منا يعرف اسمه وتاريخة الفني؟!.

عبدالغني النجدي، من أكتر ممثلين جيله خفة دم، اشتهر بأدوار الخادم والبواب والجنايني، وهي أدوار هامشية ممكن يقوم بيها أي ممثل بسيط، لكن المخرجين كانوا بيطلبوه بالاسم، وده عشان هو فعلا كان بيبقى الفاكهة الحلوة اللي في الفيلم.

بدأ عمله بالسينما في فيلم "شارع محمد على" سنة 1944، وآخر عمل شارك فيه هو"غاوي مشاكل" سنة 1980، ومجموع الأعمال الفنية اللي شارك فيها 144 عمل فني ما بين سينما وتليفزيون.

لازم يكون له "إفيه" مميز خلال الفيلم اللي بيشارك فيه، أنا مثلا لما بتفرج على فيلم هو بيمثل فيه، بأفضل مركز علشان ما تفوتنيش "إفيهاته" العبقرية.

عارفين مصطلح Master Scene، ده مصطلح سينمائي بيطلق على المشاهد المهمة في أي فيلم، أنا بقى بأطلق على"الإفيه" المميز في الفيلم نفس المصطلح، وده مش مجرد تعبير مجازي، لأن إفيهات عبدالغني النجدي مش عبارة عن كلمة مستقلة بذاتها، لا ده أنت عشان يوصلك الإفيه كما ينبغى لازم تتابع المشهد من أوله لآخره، لأن في أحيان كتير بيكون المشهد كله عبارة عن "فرشة" للإفيه بتاع عبدالغني النجدي.

والغريب بقى إن الراجل، اللي كان بيعمل الأدوار الثانوية دي، كتب سيناريوهات بعض الأفلام ومنها، قصة وسيناريو وحوار فيلم "إجازة بالعافية" إنتاج 1966، والحوار الفكاهي لفيلم "بنات بحري" إنتاج 1962، مش بس كده، ده كمان كان بيكتب أغاني، تخيلوا!!، وشارك في أغاني فيلم "السر في بير" إنتاج 1953، ومن كتر ما كان مميز في صنع الإفيه، كان بيألف نكت ويديها لإسماعيل يس وشكوكو علشان يقولوها في منولوجاتهم، وكان بيبيع لهم النكتة الواحدة بجنيه، وطبعا أنتم عارفين إن الجنيه وقتها كان يكفي أسرة فطار وغداء وعشاء لمدة 3 أو 4 أيام.

تخيلوا بقى إن الكوميديان الخطير ده بيته كان ماشي زي الساعة، كان صعب جدا وأهل بيته بيهابوه، لأنه كان أب صارم وله رهبة في قلوبهم، و ده في رأيي يخليني أقول إنه رغم شخصيته القوية في بيته إلا إنه بيقبل الأدوار الهامشية اللي بتتعرض عليه مش لأنه أكل عيش بدليل إنه بيكتب سيناريوهات يعني بالبلدي كده مش محووج للأدوار دي ومش لأنه مايقدرش يختار غيرها، لأ ده يقدر يحط رجل على رجل ويقول ياأدوار كبيرة يابلاش، لكن قبوله للأدوار دي في رأيي معناه إنه كان بيحب اللي بيعمله، علشان كده كنا ولا زلنا بنضحك معاه من قلوبنا، وكتير مننا بيحب يشوفه وبيضحك من قلبه على قفشاته من غير حتى ما يعرف إسمه إيه، لأن مشهد واحد له في الفيلم، كفيل بترك بصمته في ذهن المشاهد.

باختصار.. الراجل ده كان أسطورة.

 عبد الغنى النجدى.. بواب السينما المصرية