القصيده الرابعه !
قصيدته في الشيخ / عليآآن الطهيمي.
ياراكـب اللـي ليانـاظـرت تمثـالـه
تقول صقـر ٍ موقـع لـه علـى قمـه
متنطـح ٍ للبـراد بــراس منـزالـه
تشتت الريـح شمـل الريـش وتلمـه
فاكسار .. في قيمته زود ٍ على امثالـه
لله دره لاشــال الـعـزم بمـهـمـه
مايصير له وسق عرق الرمـل محبالـه
عـدو عـرق النفـود وهمـه وغمـه
صـدره ليامـن سـواقـه تسـاوالـه
يشرب قراطيع صلـف الريـح وتزمـه
راعيـه حـرك وهـو متريـح ٍ بالـه
متروح ٍ من بنـي عمـه لابـن عمـه
يسوقه الشوق من رجلـه الـى عقالـه
لشـوف جمعـا رجـال ٍ مابهـم خمـه
من ديرة اهل النقا .. والطيب .. والطاله
والمذهب الزين .. والتوحيد .. والعمـه
شيبانها رمـز وقـت ٍ فـات وابطالـه
وشبابهـا للعـلا فـي روسهـم همـه
علـى طرفهـا خـزاز يميـل اضلالـه
قبل يحط الظـلام الشمـس فـي كمـه
لـو مابهـا غيـر هاكالضلـع وجبالـه
نحبهـا كلنـا حــب الـولـد لامــه
( دخنه ) لعل السحـاب يصـب همالـه
على ارضها لين يطلـع كـل ماتضمـه
منها مشى الجيـب لعـل السعـد فالـه
متيـمـم ٍ يـمـة ٍ ماغيـرهـا يـمـه
منصاه رجل ٍ تهـرج النـاس بافعالـه
تبذل يمينـه .. وكثـر البـذل ماهمـه
من روس قوم ٍ تهـوم الطيـب وتنالـه
ماينكـر امجادهـا رجـل معـه ذمــه
حرب الحرايـب كعـام اللـي يورالـه
بنفسـه انـه مصمصـم راس ومطمـه
اهل المحازم .. بيـوم ٍ تعـرف رجالـه
ومنصا الوازم .. وسقم العايـل وسمـه
قلته .. وللمجـد بـس لربعـي لحالـه
كـل ٍ حبالـه موردتـه علـى الجمـه
مابـه قبيلـه ماهـي بالطيـب مختالـه
غصب ٍ على كل متبجـح .. ودرعمـه
وقصدي .. ومنصاي ابو فواز وعيالـه
وبيت ٍ بوسطـه قبايـل حـرب ملتمـه
يضك بالناس مـن جالـه الـى جالـه
يطـري علـي لياشفتـه وادي الرمـه
تنطحك ريحة شذى هيلـه .. وفنجالـه
والعود الازرق منـه ينطحـك وتشمـه
نارد صناياه .. ونصـدر علـى دلالـه
ولاهوب جوع وعطش يوم انعنـا يمـه
كل ٍ غني .. ميـر يـوم انـا انتعنالـه
دافـع حميـاً تفـوح بكـل جمجـمـه
يستاهل المـال رجـل ٍ هـذي اعمالـه
نفسه بمايـزود نفسـه طيـب مهتمـه
يفـداه مغلـول يمنـاً لـو كثـر مالـه
عن شنحة الطيب وجهـه بـارد ٍ دمـه
اللي على قـول زيـد صحيبـه ريالـه
وان طاب طيبه من الزوجه الى العمـه
يالله عسى اللي شال اطيب منه يشتالـه
يدلـي مخاليبـه زويـان .. ويخـمـه
رجـل ٍ يدنـق عـن العليـا ولا يالـه
للطيب .. والدرب قدمـه فاتـح ٍ فمـه
ودك مـن بعيـد وقـريـب تحمـالـه
بمخمـس ٍ مـن شحمـة الاذن للرمـه
وعن هالكلام .. وقصير الهرج واطواله
ياكثر بكـم الزمـان .. وياكثـر صمـه
يقولـه اللـي تهمـه صحـة اقـوالـه
ويسعى يوصـل هـدف معنـاه ويتمـه
وصلو علـى المصطفـى نبينـا وآلـه
محمـد اللـي بعـث برسالـة الامــه
==================================
! القصيده الخامسه !
أيضاً بالشيخ/ عليان الطهيمي .. بعد إعلان النتائج
وفوزهـ بمزاين الأبل
الحقيقـه يـابـو فــواز وبـكـل افتـخـار
كـل فرحـه عـارمـه للـسـدود مبـوحـه
الـف مبـروك النتيجـه وحسـن الاختـيـار
وجايزة وضح ٍ مـن الغيـض جـات مشوحـه
جـات عقـب العـام تبغـى تـرد الاعتـبـار
ماحـلا الفاحـج علـى فخـذ كـل مـدوحـه
وسم .. وشعار اهل الارماح .. والشلف القصار
والضروب اللـي بـروس الخصـوم مجوحـه
مثل مالجيش الامريكـي بطـش فـي قندهـار
ابطشـت بـارض المزايـن تقـل متسـوحـه
كنهـا تبـا تحـب السـمـا كـبـر ووقــار
مـن ثقتهـا بزينـهـا بالجمـيـع مطـوحـه
مثل فاكسـارات موكـب حـدا طـوال العمـار
يـوم جـت للعـرض امـام الاميـر مروحـه
استحقـت جايزتهـا جهـار مــن النـهـار
وتوجـت .. وكبـود حسـاد اهلهـا مفوحـه
واحـد ٍ قـال انهـا مغيضـه العـام استخـار
والله ان الـعـام هــذا لقبـهـا مـنـوحـه
===================-============
! القصيده السادسه !
راكب اللي سرعته تقل شقٍ من سمـا
ادعجٍ كنه يبا يقـول شـي ومستحـي
جيب لاند كروز وجهه تقل وجه اطخما
من غلا سعره بعيدٍ على بعض اللحـي
كن جلده لامشـا جلّـد همـال دهمـا
سيلها جريه لحا طرف الـوادي لحـي
وان مشا على هوينه .. تقل مشية عما
يتقدا يوم يمشي علـى حـروة وحـي
منوة اللي شابعٍ جوع .. رويانٍ ظمـا
جائعٍ ظامي على شوف غروٍ منتحـي
كل مايزمي خياله على بالـي .. زمـا
هم قلبي .. والمشاريه تنحانـي نحـي
يامروجت الحكي ماش سن بـلا جمـا
النوايا كنها الشمس والـدرب ابرحـي
مالعدواني دخل فـي فراقـه .. وانمـا
عيدوا يوم ان بعده فحـا قلبـي فحـي
مارميتـم إذ رميتـم لكـن الله رمــا
دارت الدنيا علينا مثـل دور الرحـي
واوجودي كل مااذكرك ياعـذب اللمـا
وجد من ذنبه محا كل اهل بيته محـي
==============================
! القصيده الثامنه !
لعل السحاب اللي مـن البعـد دوبـه واق
على حد الارض من السما تسبـر اعناقـه
على ديـرة دونـه جنـوبٍ عنـه ينسـاق
تقـفـاه وتلمـلـم شتـاتـه وتستـاقـه
ذعاذيـع ريـحٍ ماتشيـل وتـحـط رواق
يصحبها شوية عنـف وانسامهـا رقاقـه
لو تمـر بيـت البـدو مترامـي الاشنـاق
تهـزه شـوي شـوي ماترمـي رواقــه
تسوق السحاب بدبرة المانـع .. الـرزاق
إلـهٍ عبيـده تطلـب رضــاه وعتـاقـه
ولامنه تسـاوى فـوق دارٍ غلاهـا فـاق
حدود الغـلا .. تستـأذن الريـح لفراقـه
يقر ويسر البـال .. والعيـن .. والخفـاق
ويلجّّ رعده .. ويرفرف البـرق بأشناقـه
من بعيد برقه يسهـر المسنـي المشتـاق
هكاالليل يقضـي كـل ليلـه علـى ساقـه
كاانـه يقـول ليانتفـض برقـه الشعـاق
على الهـون تكفـا ماعلـى قلبـي لحاقـه
وصلها وباشرهـا علـى غيبـة الاشفـاق
جـلال مطـره مايعطـي الوقـت لدقـاقـه
تضيق بسخاه الاوديـه والفضـا ماضـاق
بغيمه .. وهتانـه .. ورعـده .. وبراقـه
يمد الجذع بالوصل .. والغصن .. والاوراق
بعد مااشتكى من هجـره الغصـن لوراقـه
شهر .. ويتجاور فيه راعي غنم .. ونياق
بربله .. وحوذانه ضحـى تشبـع الناقـه
تكحـل بنبـت فياضـه العطـره الاحـداق
من يشوف نبته يشكر الله علـى ارزاقـه
شذا نبـت ريضانـه ماينبـاع بالاسـواق
مايجمع شذاها مـع بعـض غيـر خلاقـه
تجـلا بتنويـع الزهـر قـدرة الـخـلاق
تلاويـن نبتـه تأسـر قلـوب عشـاقـه
ربيعه .. وغدرانه .. متى مانهمـر دفـاق
لـدارٍ لهـا كــل الاحاسـيـس تـواقـه
سلامي عليها من اولـي لاخـر الارمـاق
ولها صادق الاشـواق باقـه .. ورا باقـه
غلاها وسره دافنـه فـي ثـرى الاعمـاق
وأكيد الغلا ماجـا مـن البـاب .. للطاقـه
======================
! القصيده التاسعة !
وين انت ياللي كـل ماتمـر ذكـراك
توقد فتيل الشوق وتـذوب الاضـلاع
تعال..وجلـس صبلـي مـن شفايـك
هيل الكلام اللـي تصبـه بالاسمـاع
مدري متى اشبع من سوالفك..وارواك
اثر الحكي بعضـه خزامـى ونعنـاع
عن كل من حولـي تاخذنـي لدنيـاك
واندم على وقتٍ قبل لاعرفـك ضـاع
تزهر حياتي فـي حضـورك ولامـاك
مثل المطر..تزهر من حضوره القـاع
قلت ابي اجرب قلبي احاول.. انسـاك
ورتعت قبل القلـب يـدري ويرتـاع
ساق الهوا مركب غرامـي لمرسـاك
ماعاد ينفـع بـه مجاديـف وشـراع
عطني حضورك..وإقطع دروب فرقاك
لايهب للفرقا علـى القلـب ذعـذاع
مايستحق يعيش بـه كـود شـرواك
قلبٍ يضمك حـب ويضمـك اوجـاع
=====================
! القصيده العاشره !
راكب اللي كـن زولـه زول ذيـب
ان نطحته .. وان قفيتـه مـن ورا
وان عرض لك قلت مابالوصف ريب
جنب ذيب ٍ لاحقـه جـوع وعـرا
شاصي التصميم لاند كـروز جيـب
مايبيعـه مـن شــراه ليـاشـرا
مايبيعـه غيـر مـردي النصيـب
او من يحـده علـى قروشـه زرا
مايهـمـه لانـفـود ولاجـذيـب
ولا الطلوع اللي مثـل طلعـة كـرا
لاهمزو قير أدبله .. جالـه نحيـب
مثل من ميتـه علـى بالـه طـرا
ناحل الاطـراف تصميمـه عجيـب
مع سماح الـدرب مشيـه بختـرا
كـن جـرات الربابـه بالسبـيـب
صـوت ماطـوره ليامنـه ســرا
نحروه الليـل مـع وقـت المغيـب
الثنين اللـي علـى العـز أقصـرا
ماعليه الا صحيـب ٍ مـع صحيـب
الملح .. والزاد .. والطيب .. خشرا
ماعليهم من بسيط .. ومن صعيـب
بالـدروب .. وبالمحـلات خـبـرا
ودهـم مايمـرحـون الا قـريـب
مـن مكـان ٍ تقـل لاجـوه ومـرا
من شعيب يحدرونـه مـع شعيـب
والفضى مشمـوس والديـره ثـرا
ديـرة ٍ ربـي لهلهـا مستجـيـب
كل وادي مـن فضـل ربـي جـرا
جوها من صادق الوسمـي عشيـب
للحبـاري والقطـا فيـهـا حــرا
نبتهـا يفـوح كنـه فـوح طيـب
ماتصـدق باللـي عيونـك تــرا
والله ان عمـاس راسـي مايطيـب
ولا يطيـب الـزاد ويلـذ الـكـرا
غير لا رقبت النباء مثـل الرقيـب
ونمت فيها ايـام لـو شـح الـذرا
بالخصوص لياصدف جـو ٍ رهيـب
وقمت ادوج من الفياض الى القـرا
فوق جيبٍ كـن زولـه زول ذيـب
ان نطحته .. وان قفيتـه مـن ورا
